الفينيق ميديا

Facebook
Twitter
LinkedIn
Pinterest
Pocket
WhatsApp

 ” إفني اللي في البال “

 

 

قصيدة زجلية الشاعر محمد الوحداني

 

 

 

إفني اللي كانت حال و ولات حالة !

إفني مولات القبة و الشيخ

إفني اللي كانت جنة

و تلات بالشيح و الريح !

 

إفني يا لبنات و يا لولاد

إفني جوهرة بين لجبال و البحر و الواد

إفني جنان ريحتو حباق و هندية و أمجاد

افني بماها و رملها و أسودها و لاسياد

إفني اللي يحبها اللي فيها داز و فيها تزاد

إفني مقام و آية و حال و لبسة و جواد

إفني عريس و عروس و عرس و زينة لبلاد

إفني خيل مأصلة و لوحة مسوكة و عناد …

 

إفني د بوجرة و أمزدوغ إفني اللي بتاريخو و ساسو

جبال إفني اللي جاها القايد حيدا و تقطع راسو

و جاها القايد الكلاوي و هرب هو و عساسو

بحورها اللي كان فيها كرتيت و النكليز

و من قبلو لالمان و البرتقيز

حدودها اللي جاها الجنيرال دولامونط و العساكرية من باريز

و جاها كباص و فرانكو و اهل كناريا و السبنيول

إفني اللي ما تهزمات بالفركاطة و القنبول

تلات في يدين الشمايت و القهرة و اللي يحلبها بزول .

 

شوفوا يا لبنات و يا لولاد

نحكيها ليكوم حكاية تعاد :

 

إفني أمل و قمرة و شميشة و بارانديا و لاروية و قباب

إفني طريق النعالة و بومرسال و تيات و ناقوس و عواد

 

افني تاكومبا و شيوخ و تاوردا و كرايما و نطافي و شعاب

إفني أفزضاض، قصبة و ألدون و حوت لعلو و الجرف و ميعاد

 

إفني كناوة

و علي بابا و ولاد مورينو و كوريلا و الناس اللي كانوا خاوة !

 

إفني ألمكار و إفني مقارد لعار

و الخيل و التبوريدة و نزاهات الطلبة و لاخيار

 

إفني الدريجة و البيي و التشينشينات

و الطرومبيات و لاستيك د لبنات

و حابا و بيسو و أديلانتي و بيرتيكوما

و اللعب بالقيوش والسيك في راس لحوما

 

إفني بيضةبيضة لله واشتاتاتا أولاد الحراثا

 

واش إفني مشات يا لولااااد؟!!

ما يمكن !

 

يحن يحن …

 

إفني مولات الساروت و الباب

إفني مولات الكصعة د المعروف

إفني مولات السبع د الكزيرة اللي ما تعرف خوف

إفني اللي جالسة فوق عرش بولعلام و الضباب

إفني اللي فاتحا حضانها لكل من جا و ما جاب

إفني المغدورة

إفني المقهورة

إفني الواقفة قدام مولانا بلا شاهد و لا حجاب

إفني المهمومة

إفني المظلومة

شكون فينا من غير الله يحل ثقافها و يهز لامانة و لكتاب ؟

 

إفني اللي كانت جامع و كنسية و فيها ولاد محمد و عيسى

إفني اللي ممدودة بين القلوب

بلا أحقاد !

إفني المزروعة بدم الشعوب

و المسكونة بكل قبيلة و بلاد

 

إفني بولعلام و البرابر و تامحروشت و الكاطع و الودادية

و كولومينا بديورها و العين و ادوفقير و المنطلق و الجوطية

 

إفني اللي منورة بالقبايل د ايت باعمران :

 

إفني اللي فيها مستي و آيت اخلف و آيت اعزة و صبويا

و آيت الخمس و آيت عبلا و آيت النص و ميرالفت الزاهية

و مك و ميا

و بوك و بويا

و خوك و خويا

و ختك و ختيا

إفني اللي كانت واحدة و ولات أنت براني و انت برانيا ؟!!

 

إفني مولات المرسى و التليفريك

إفني مولات التيران و الكازون

إفني مولات الجريدة و الإذاعة و لابياسون

إفني مولات الباركي د الحيوان

إفني مولات النادي و المسرح و السينيمات و لكريان

إفني مولات الكرانخا و طريق العين و الفاكيا مزروعة و البنان

إفني اللي تاع زمان

إفني اللي كان فيها كل شي مزيان

البشار و الخاطر و لامان

و الديور مفتوحا بلا قفل

خيط على لبواب سلم و دخل

 

مالك أش طرا و جرا ؟

يا يفني يا لحبيية

دارو بك لعدا و لغدر من كل جيهة !

شي باع فيك و شرا

و شي جالس يتفرج بلا حيا و مقضيها

تقطاع و طنز و غيبة !

 

فين هوما ولادك يا بلادي

فين هي الهمة و الشان

و ذاكشي اللي كلو كان

فين هوما ولادك يا بلادي

فين هوما نقولو ليهم :

 

إفني اللي ما تستاهل هاذ لاجراح

إفني اللي نسر و بحر تصبر و ما تقول آح

إفني اللي في لارواح

نفس عزيزة في الذل ما ترتاح

إفني قد ما يجرى و ينكتاب في لالواح

إفني اللي في الخاطر مساها قد ما طال جايو صباح…..

 

Facebook
Twitter
LinkedIn
Pinterest
Pocket
WhatsApp

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

لا تفوت أهم المقالات والأحداث المستجدة

آخر المستجدات